المشاريع الغير منجزة
راح اعلمكم شنو UFO بلغة الكويلت
وراح نستمتع بالموضوع
UFO (unfinished object)
يعني ” UFO (مشروع غير مكتمل) في عالم اللحاف ،
وانا اسميه ( كمزحه) مشاريع متعثرة
يعني قيد التنفيذ من اللحاف او نصف المكتمل اللي تحتفظين في الخزانة أو في الصناديق أو الجرارات والأكياس، و في الأدراج.
الأغلب عنده لحف ومشاريع UFO
السؤال
كم عددهم ؟ وليش صار عندج UFO ؟
الإجابات كانت كالتالي :-
أ. نزيهه المهيني ( كويلتر ) تقول :-
هذا الموضوع وايد شاغلني انه بعض المشاريع ما اكتملت مع انه البدايات كانت رائعة
نحتاج شحذ الهمم ياريت نتحد ونضع برنامج يناسب الجميع 👍💕
أ. يسرى سبتي ( كويلتر ) تقول :-
عندي UFO بعدد كبير والاسباب :
1- الملل
2- التعثر وسط العمل
3- هناك مشاريع في البدايات لا ترقى بمستوانا الحالي (🤪🤪🤪)
4- دخول افكار جديدة اثناء العمل لا يمكن مقاومتها
5- تزاحم الافكار
6- طبعا كذلك من الاسباب ان احنا ودنا نتعلم كل شي وما نركز على مهارة معينة
ومع هذا عاد تصدقون وايد حلو الشعور لما يكون عندج مشروع متعثر وتقعدين تصممين انج تخلصينة
هذا الموضوع وايد يؤرقني ابي اعرف انا صح والا غلط؟
أم مهدي ( كويلتر ) تقول :-
انا عندي قطعتين واحدة مضروبة بس تحتاج الاطار
واحدة ثانية بسويلها تضريب يدوي بس الألم بأصابعي مو مخليني ابلش فيه( احتمال اسويله تضريب ماكينة)
فاديه احمد ( كويلتر ) تقول :-
وصحيح الكلام نحب نطبق وايد أشياء تعلمناها ونشوف وااايد أفكار جميلة بس المشكلة مافي وقت نطبقهم ولما نبدأ مشروع وقبل ما نخلصه نشوف فكرة جديدة حلوة ونبي نسويها ومع ضيق الوقت والمسؤوليات اثنينهم يوقفون ما نخلصهم 😊😊😊
د، سميره صادق ( هاوية خياطة )تقول :-
انا وحده مبتدئه اخذت اول دوره عندج ومن بعدها اتنقل من تطريز لي كويلت لي الفنون الثانيه فالمشكله ماكو تركيز علي شي معين بحيث يصير اتقان في العمل وبعدين نروح نتعلم شي ثاني
أ. سجى بهبهاني ( مدرب فن الكولاج ) تقول :-
عندي مشروع كنت مسميته بنات شربت 😄 صار عندي خطا بالقياسات وقلتيلي فتحيهم صار فيني 😵💫😣 فصفطته ونومت بنات شربت بالدرج
ام جاسم تبيني اكمله لازم اييلج عشان تشجعيني .. يالله يا سجا عاشت سجا 👏🏼👏🏼👏🏼👏🏼
أ. تهاني الاستاد ( هاوية خياطة ) تقول
: علقت تهاني على موضوع المشاريع الغير مكتملة انا عندي مشاريع اتركنت بسبب اعتراض الظروف مثل انشغالي بالسفر وهو احد الاسباب وساعات بعز اندماجي يجيني تلفون وتنقطع همتي بالشغل ، وكذلك ترددي في اختيار الاقمشة المناسبة للمشروع ف وجود اجزاء كثيرة في اللوحة تحتاج وقت لاختيار الانسب و بفكره التحدي انشاء الله اتمكن من انجازه
أريج ( هاوية خياطة ) تقول :-
انا عندي مشاريع مركونه بس مو كويلت كروشيه وتطريز 🤣
ووايد ببالي افكار ابي اطبقها بالكويلت والخياطة بس اسم الله عليهم اليهال ماخذين طاقتي كلها وماكان عندي شغالة🫠
الحين يتلي شغاله الحمدلله دعواتكم ينتظم وقتي مع اليهال وان شاءالله اقدر اشتغل عدل 😆
ليلى (هاوية خياطة) تقول :-
عندي اكثر من كويلت .. وافكار متزاحمة
الاسباب .. اليهال وحوستهم وماكو شغالة تساعد وشكلها سالفة الشغالة مطولة 🥲
منيره الهويدي (هاوية خياطة ) تقول :-
انا عندي مشروع كفر حق حفيدتي سويت نصه ووقفت , بس افضىٰ ابلش اسويه 😁
أ.زينب سعيد ( مدرب تطريز يدوي ) تقول :-
سبب المشاريع الفضائية اللي عندي 😆 وايد أسباب..
اول شي انشغالات البيت واليهال وماعندي خادمة تساعد في البيت
بس ماحب أقعد فاضية كلش، لازم أشتغل بشي، فدايما أتخيل أفكار ومشاريع ودي أطبقها من باب التحدي او شي جديد ابي اجربه.. احيانا بمجرد اني نجحت في جزء التحدي في المشروع أركنه وما اكمله خلاص..
وتطلع لي فكرة ثانية وهكذا..
ومرات ادخل دورات اتعلم شي جديد وبمجرد ما اتعلمه ما اكمل مشاريع الدورة فتظل مشاريع ناقصة عندي..
واحيانا لأن الادوات ماتكفي. لون خيط خلص في التطريز مثلا.. أأجله ليما اشتريه او اطلبه فأنساه غالبا🥲بشكل عام احس السبب الرئيسي تدفق الأفكار وعدم ترتيبها وعدم تقدير حجم التنفيذ المناسب.. والحماس الأولي اللي يختفي بآخر المشروع أحيانا..
مجرد ما أحط المشاريع الناقصة في سلة الانتظار عندي.. تطلع أشياء أهم منها.. مثلا طلبيات.. تجهيزات لدورات.. الخ ف خلاص أنسى الأولانيين
من الأسباب بعد ان في مشاريع ماحد ينطرني اخلصها..فعادي متى ماكملتها كملتها..
وأدري ان الحل ممكن نحط هيد لاين لكل مشروع بس مو كل مرة نقدر نلتزم
ايمان المهنا ( هاوية خياطة) تقول :-
انا اقول صاحب بالين كداب لازم التركيز على الشي الى حد الانتهاء والاتقان وانسكر الملف ثم نقلب الصفحه للي بعده والا مافي انتاجيه مضبوطه
nisreenshubair72 @ تقول :-
اكون اشتغل بالقطعه اللي يحصل خطأ بالقياس مثلا او بالتطريز ولازم افكه او يصير ظرف وانشغل او تجيني طلبيه اترك القطعه اللي اشتغل فيها وامسك قطعه الطلبيه
Darzza @ ( كويلتر احترافي ) تقول :-
سرعة الوقت لا تتماشى مع عدد الأفكار .
نبدأ في ترتيبأفكارنا .. خل نتعرف على أسباب تعلّق المشروع
(U O F )
1- المشروع غير مكتمل بسبب خطأ فني يحتاج وقت طويل حتى يضبط أو لايمكن ان يتعالج .. وسبب هذا قلّه الخبرة ومحدوديتها في وقت تصميمه
2- المشروع غير مكتمل بسبب خطأ في الخياطه ويحتاج همّة كبيرة ولا رغبه في معالجته .. قد يكون سببه استمرار الضغط على العزم النفسي او الهمة وعدم ترك راحه جسديه مما ادى ادى الشعور بعدم الرغبه في اتمام المشروع .
3- المشروع غير مكتمل لوجود خطأ في القياسات .. وهذا سببه سوء التخطيط او عدم فهم مخطط البترون
4- المشروع غير مكتمل بسبب الاحباط من نقص المواد في القماش … وهذا طبيعي اذا كانت القياسات اكبر من كميه القماش المجهز للمشروع او عدم توفر البديل له
5- المشروع غير مكتمل بسبب جذب افكار جديده أو ما نسميها تداخل الافكار لرغم صحه العمل به ووجود كل التقنيات والمخطط له تداخل الأفكار اثناء التطبيق مثل .. ظروف حياتيه طارئه / اعتراض المشروع بافكار جديده مثل مشاركة دورات جديده وتحديات وانشطه اخري
6- المشروع غير مكتمل بسبب الاحباط من نتيجة المشروع قد تكون الالوان غير متناسقه .. وهذا سببه قله الخبره في اختيار الالوان وطريقة توزيعها سواء القماش او الخيوط .
7- المشروع غير مكتمل بسبب عدم الرضىٰ الشخصي بالنتيجه .. بسبب الاصرار على ان تكون القطعه خاليه تماماً من الأخطاء وعدم القناعة بنتيجه العمل اليدوي .
8- المشروع غير مكتمل بسبب حجم القطعه .. وقد يكون سببه صغر حجم مساحة الورشه الخاصة و عدم معرفه طرق استغلال المساحات في اتمام المشاريع الكبيره .
9- المشروع غير مكتمل بسبب عرقله في مكينه الخياطه .. سببه عدم تفهم ومعرفة طبيعه عمل المكينه وقدرتها التقنية .
10- المشروع غير مكتمل بسبب الهدف الإبداعي فهي بحاجه لوقت طويل جداً لاتمامه ولا يمكن تحديد نهايته لانها قطعة ابداعيه من خيال الصانع .. قد يكون سببه قله الخبرة في حدود الافكار الابداعيه وعدم قناعه الصانع بان الفكره الابداعيه قد يستغرق سنه او اكثر اذا اقتضت الحاجه في اتمامها .
11- المشروع غير مكتمل بسبب الخوف وعدم القدرة على إتمامها خوفا من الوقوع في خطأ .. بسبب حاجه المبدع الى جرءه في التصميم .
12- المشروع غير مكتمل بسبب الشعور بالملل اثناء العمل .. بسبب فقد طرق رفع الروح المعنويه للانجاز وقد يكون سبب طبيعه بعض الاشخاص بعدم القدره على العمل والانجاز الانفرادي.
13- المشروع غير مكتمل بسبب الغلو والمبالغة في الإضافات ممايسبب الانزعاج والخوف من شكل النتيجه
كيف أحل مشكل المشاريع الغير منجزة ( UFO) ؟
: مقدمة الحلول هو الشعار
“اجتهد من أجل التقدم، وليس الكمال”
Progress not perfection قواعد عامه
- تنظيم الوقت ( تحديد وقت زمني تلتزمين فيه كل يوم بنفس التوقيت بدون اي تهاون ) ممكن اعدادجدول لتنظيم العمل
- تنظيف الورشه أو ركن العمل قبل العمل بيوم مع تعطيرها ويتكرر ببعد الانتهاء من العمل
- الابتعاد عن الهاتف النقال والتواصل الاجتماعي في فتره العمل الجادلراحه
- ممارسه تمرين تنشط الدورة الدموية للجسم
- الاكل الصحي تحضير ركن أو صينيه فيها شراب مفضّل لديك مثل مطارة زهورات او قهوه الخ .
- الاستماع الى دعاء او اذكار في فتره تجهيز الأدوات قبل العمل
أرفعي معنوياتك من خلال :-
- استرجعي بإيجابيات وحقائق تملكينها ( مهارات فنية و ابداع وملكة الذكاء والصبر الخ . )
- تبسيط العمل ( كل شي سهل وبسبط وماكو شي صعب ومستعصب )
- مساعده الاخرين ( التطوع لكسب الاجر والثواب .. )
- مساهمه في انجاز مشروع جماعي ( عضو فعال في قروب أو جماعات تطوعية الخ ..)
- مشاهده تجارب الاخرين في حل مشاكل التعثر
- الإيمان بأن هناك الأغلب يمر بنفس المشكلة ( مو بس انا عندي هالمشكله )
- القناعة و الأمل ( انا اقدر اسوي كل شي حلو وهي قطعه فريده من نوعها )
قد يكون قرارك هو تحويل المشروع بسبب قدم القطعة الغير منجزة فماهي الافكار التي ممكن ان تحولي لها القطعة ؟
شنطه
مريله مطبخ
مقلمه
قاعده كوب أو وعاء او شنطه نقصه
مفرش طاوله طعام
الخ … عليك البحث وسوف تستمتعين بالنتائج
UFO مع تحياتي لكم بقضاء أوقات ممتعه والتخلص من
